كضابه ورخيصه وإشتراك بالفكه
كسرتي البنيتو وإتهدم وإتدكه
لو قايلاني بندم وإنكسر وإتبكه
تتقده السماء وإبليس يطوف في مكه
ماعقرت عليك الزايله شان إتعنه
بس عقرت علي والمتلي مابتنه
في ستين غرامك والف من تتمنه
لاريدك فرض لا لي بودي الجنه
ومايغررك قليبا" بي غرامو مفشر
الزارع الحرج حتما" حصادو مقشر
بليلتا" من مرحب بالضيوف ومبشر
افضل من ضبايح للبلاقي مكشر
لاطلقك رمتني ولاجرحني عياره
في غيرك رويحتي بتلقه بكره دياره
في النوم إن خيالك مره جاني زياره
عيني بي السهر عدم التلاقي خياره
وإن حرت علي باكر بكرف النسمه
لي هيبه وكرامه من الكواكب اسمه
إن قلتي آلحزن غره وتميمه ووسمه
قبلك كم جرح جواي مضاريه البسمه
والبكاء للبفوت آبنيه تب مابريدو
وإن قلتي الوجع منو ودليلو وسيدو
يوم إطرو الحزن فطرو وصايمو وعيدو
قرريع النخل بعد الصفار آبفيدو
ريدك ولى عهدو وكل سنين الغيره
والقلب العشق مله وكرهتك سيره
لوعشمك شقاي وبكاي ونار الحيره
زمزم تندفن تنشف منابع بيره
قررت وحلف بي الله يامبيوعه
لو صبحت فرض لي رجعتك مرجوعه
لو ترجي الموايق يتهمل مدموعه
تشرق من غرب شمس الله يامخدوعه
موفال عنتره وقيس إتنخج وإتقله
عندي العذه اولى وبيها يوت إتعله
اغبش ود بلد من فرضي مابتخله
ملعون العشق والمتلي مابتزله
عيني مابيبكن ومن خلق ناشفات
وجنحين الصبر والسمته لي صافات
احلام العبوس اقلبي خيل صافات
وخلي الجفلتهن واقرع الواقفات
باكر تندمي وتنزل دموعك سايله
يا المتكله في حيتطا" قصيره ومايله
كان المولى مده عمرنا فوق الزايله
بوريك النجم عذ نهار القايله
لو غراك جمالك فوقي ماتتعالي
نسبي جمالك إنتي ومابيبقي كمالي
كان انا مابخاف الله الكريم العالي
يوسف يابنيه جمالو باقي جمالي
فوقي عفاف وهيبه مستفاني وعذه
ركازا" قسم ساعت تخبت الهذه
من زمني الصغير انا مابعرف البذه
برضع لبوة الاسد ام جددل لذه
ضق لبن السواجع وإنفطم بي شربو
داوسة الاسد جربته كتلو وزربو
إبليس اللعين انا يوم امش بي دربو
بصبح شيخ وواعظ وينسه شركو وحربو
0 تعليق: